Monday, July 11, 2011

පාරිසරික හා සංස්කෘතික චාරිකා -2011

මිහිතල මිතුරෝ මගින් 2011 ජුලි 02 වන දින  සංවිධානය කරන ලද පාරිසරික හා සංස්කෘතික චාරිකා -2011 සඳහා මෙවර 63 දෙනෙකුගේ සහභාගිත්වය ලැබුණිි. මෙම චාරිකාව අතිශයින් සාර්ථක  චාරිකාවක් වූ බව එයට සහභාගිවූ සියල්ලන්ගේම පොදු මතය විය. චාරිකාවට සහභාගිවන්නවුන් සඳහා චාරිකා ස්ථානයන්හි ඇති සංස්කෘතික, පාරිසරික, පුරා විද්‍යාත්මක හා ඓතිහාසික වැදගත්කම අළලා රචිත වර්ණ පොත් පිංචක් ද ලබා දීමට සංවිධායක මඩුල්ල කටයුතු යොදා තිබුණි. ( මෙම පොත් පිංචෙහි විද්‍යුත් පිටපතක් අවශ්‍ය අයට ඉල්ලූම් කර නොමිලේ ලබා ගත හැකිය. ඒ සඳහා ඔබගේ විද්‍යුත් ලිපිනය ලබා දෙන්න)
මෙම චාරිකාවේදි  අධ්‍යයනය සඳහා පළමුව තෝරා ගෙන තිබුනේ අරන්කැලේ ( ශී්‍ර ලංකාවේ අන්තිම මහරහතුන් වන මලියදේව මහරහතුන් වැඩසිටි තපෝවනය) තපෝවනයයි. බවුන් වඩන භික්ෂුන්ට ඖෂධ ඇඟ ගල්වා උණුපැන් ස්නානය සඳහා වෙන් වූ ජන්තාඝරය, චන්කමනය(සක්මන් මැදුර), අපුර්වතම නිරිමාණයක් වූ සම්මුඛ ලෙන, සිමා මාලකය, පධානඝර,පොකුණු සහ පෙත් මං මෙන්ම කුරුල්ලන්, සමනළුන් හා අංකටුස්සන් නැරඹිය හැකි නිසසල පරිසර පද්ධතියක් නැරඹීමට සහභාගිකයින්ට වාසනාව ලැබුණි.
දෙවන ස්ථානය වූයේ රැස්වෙහෙරයි. අව්කන බුදු පිළිමයට නෑකම් කියන අඩි 42 අඟල් 4 ක් උස්වූ ශෛලමය පිළිමය, දෙතිස් ඵල බෝධිය, හා අතින් වියන ලද සිවුරක් අන්දවා පසුව බදාම ගා සකසන ලද සැතපෙන බුදු පිළිමය මෙහි දි දැකිය හැකිය. ( මෙම ස්ථානය පිළිබඳව සැකසුනු විඩියෝ වාර්තා වැඩසටහනක් ඔබේ විද්‍යුත් ලිපිනයට නොමිලේ ලබා ගත හැකිය)
තෙවන ස්ථානය වූයේ හත්ථීකුච්ඡි  විහාරයයි.
බස් රථයේදී "මිහිතල එෆ් එම්" මෙහෙය වූ වැඩසටහන් සියල්ලන්ගේම දැණුමට හා විනෝදයට හේතු විය. විශේෂයෙන් " පුළුවන්නම් දිනා ගන්න " වැඩ සටහන ජනපි්‍රය විය. සහභාගිකයින්ට තෑගි පිරිනමන ප්‍රශ්න විචාරාත්මක වැඩසටහනක් වු එය එදින චාරිකාව නැවත සමාලෝචනය කිරිමකි. සහභාගිවූ තරඟ කරුවන් 5 දෙනෙකු අතුරෙන් තිදෙනකු මුදල් ත්‍යාග දිනා ගැනිමට සමත්විය.

කොඩිගහකන්ද වනපෙත අභය භූමියක් බවට.......

මිහිතල මිතුරෝ සහ කොඩිගහකන්ද සංරක්ෂණ ප්‍රජා පදනම විසින් කරන ලද ඉල්ලීමකට අනුව වනජීවී සංරක්ෂණ දෙපාර්තමේන්තුව කොඩිගහකන්ද වනපෙත අභය භූමියක් ලෙස ප්‍රකාශ කිරීමට තීරණය කර ඇත. කළුතර දිස්ති්‍රක්කයේ ප්‍රථම වනජීවී කලාපය බවට පත්වන මෙම වනපෙතෙහි මායිම් නිර්ණය කිරීම සඳහා 2011 ජූනි 28 වන දින වනජීවී සහකාර අධ්‍යක්ෂ සුරවිර මහත්මාගේ ප්‍රධානත්වයෙන් වනජීවී නිලධාරීන් කණ්ඩායමක් පැමිනියේය. මෙදින මෙම අවස්ථාවට සහභාගිවිම සඳහා හොරණ සහකාර ප්‍රාදේශීය ලේකම් තුමා, ප්‍රාදේශිය සභා නිලධාරීන්, ග්‍රාම නිලධාරී තුමිය, හා ඉහත සංවිධාන දෙකෙහි නිලධාරීන් හා සාමාජිකයින් විශාල පිරිසක් සහභාගි විය.